Përplasja Turqi-Greqi, autoritetet turko-qipriote rihapin plazhin e braktisur nga grekët

Autoritetet në Qipron Veriore deklaruan të martën se do të rihapin plazhin e qytetit të braktisur të Varoshës, një njoftim ky që ka gjasa të rrisë tensionet me greko-qipriotët dhe të rikthejë në vëmendje pushtimin turk të vitit 1974, që ndau përgjysmë ishullin.

“Kemi nisur një proces për të ripopulluar zonat e braktisura të tokës sonë, përfshirë plazhin Maras. Varosha, që ishte si një qytet fantazmë, tani po ringjallet. Me vullnetin e Zotit, ne do të fillojmë ta përdorim plazhin të enjten në mëngjes, bashkë me qytetarët tanë”, deklaroi Ersin Tatar, kryeministri i Qipros Veriore.

Tatar e bëri njoftimin në Ankara, përkrah presidentit turk Recep Tayyip Erdogan, i cili tha se e mbështet vendimin për Varoshën, një ish-resort i braktisur prej dekadash.

“Kjo është një e drejtë e autoriteteve turko-qipriote. Ndaj, në dritën e kësaj të vërtete, ne e mbështesim tërësisht vendimin tuaj për të hapur plazhin e bukur të Marasit për qytetarët tuaj”, tha nga ana e tij Erdogan.

Mbështetja mund të rëndojë pozitën e Turqisë përballë BE-së dhe të rikthejë tensionet për pretendimet territoriale në Mesdhe, të qetësuara pasi Ankaraja dhe Athina ranë dakord për bisedime.

Gjithashtu, lëvizja ka gjasa të acarojë greko-qipriotët në ishullin mesdhetar, rreth 39 mijë prej të cilëve dikur jetonin në Varosha, përpara se të dëboheshin nga forcat turke 46 vjet më parë.