Kirgistani në kaos, tensione mes grupeve opozitare që duan të marrin pushtetin

Parlamenti i Kirgistanit nuk ka arritur të mbledhë një kuorum gjatë seancës së mbajtur në orët e vona të natës, duke e lënë shtetin e Azisë Qendrore në një vakum pushteti.

Në këtë situatë grupet rivale opozitare u përpoqën të merrnin pushtetin pas rrëzimit të kabinetit. Ish-Republika Sovjetike, e cila ndodhet në kufi me Kinën, është përfshirë nga trazirat prej disa ditësh kur mijëra njerëz nisën të protestojnë kundër rezultateve të zgjedhjeve parlamentare duke sulmuar edhe ndërtesat qeveritare.  

Pas protestave, Kryeministri i Kirgistanit Kubatbek Boronov dha dorëheqjen, ndërsa për të “parandaluar përshkallëzimin e tensioneve u mor vendimi që të mos njihet as rezultati i zgjedhjeve.

Tre grupet opozitare kanë propozuar kandidatët e tyre për kryeministër të përkohshëm, të cilët do të duhet të mbikëqyrin një votim të përsëritur në muajt e ardhshëm.

Shumë qytetarë në Kirgistanit fajësojnë presidentin për lejimin e blerjes sistematike të votave dhe parregullsive të tjera të përhapura gjatë zgjedhjeve parlamentare për të siguruar që vetëm partitë besnike të tij të fitojnë vende në parlament.

Edhe pas shtypjes së dhunshme të protestuesve, partitë e opozitës duan që presidenti Jeenbekov të largohet.

Kjo është kryengritja e tretë që nga viti 2005 në Kirgistan. “Revolucioni i Tulipanit” në 2005 dhe “Revolucioni i Prillit” në 2010 që rrëzoi presidentët në pushtet u pasuan nga plaçkitjet, marrja e bizneseve private me forcë dhe, në 2010, nga përplasjet etnike. Këtë herë, pas asaj që tani quhet gjerësisht si “revolucioni i Tetorit”, shumë kanë frikë se një trazirë e dhunë e tillë mund të ndodhë përsëri.

Vendi tashmë po përballet me paqëndrueshmëri si në kryeqytet ashtu edhe në rajone.