Alarm në Londër, kryebashkiaku paralajmëron përshkallëzimin e masave anti-Covid

Kryebashkiaku i Londrës, Sadiq Khan paralajmëroi se në ditët e ardhshme në qytet mund të ketë një përshkallëzim të masave kundër përhapjes së koronavirusit.

Në bazë të sistemit me tre nivele të prezantuar nga kryeministri Johnson, Londra ndodhet në nivelin e mesëm, më i ulëti para nivelit të lartë dhe atij shumë të lartë, në vartësi të të cilëve caktohen masat.

Khan deklaroi se treguesit në kryeqytet reflektojnë rritjen e rasteve të reja të infektimit, shtrimeve në spitale dhe atyre në terapi intensive, që sipas tij sugjerojnë se kryeqyteti anglez po lëviz në drejtim të gabuar dhe se është çështje ditësh përpara se metropoli të lëvizë në nivelin e ardhshëm të masave.

“Kam frikë se lajmi i keq është se do të jetë e paevitueshme, se në një moment do të kalojmë pikën kulmore dhe do të lëvizim nga niveli i parë në atë të dytë të sistemit të qeverisë,” – u shpreh Khan.

Në nivelin aktual, londinezët janë subjekt i rregullave kombëtare, që përfshijnë kufizimin në 6 persona të grumbullimeve dhe mbylljen në 10 të darkës të pabeve, klubeve dhe restoranteve.

Në bazë të nivelit të dytë, familjet do të ndalohen të mblidhen me njëra-tjetrën, ndërsa do të jenë në fuqi edhe kufizimet për grumbullimet shoqërore dhe një shtetrrethim për qendrat e argëtimit.