Shefi i Kabinetit të Shtëpisë së Bardhë rezulton pozitiv me COVID-19

Shefi i Kabinetit të Shtëpisë së Bardhë, Mark Meadows, i cili është shfaqur shpesh në evente publike pa mbajtur maskë, është diagnostikuar me COVID-19.

Edhe një tjetër asistent i fushatës elektorale po ashtu ka rezultuar pozitiv me coronavirus.

Meadows, këshilltar i lartë i Trump dhe ish-ligjvënës i Karolinës së Veriut, e ka shoqëruar presidentin rregullisht gjatë ditëve të fundit të fushatës.

Meadows ishte dhe në festën që u mbajt në Shtëpinë e Bardhë në natën e zgjedhjeve ku ishin të pranishëm dhjetëra mbështetës të Trump.

Trump e ka nënvlerësuar shpesh ashpërsinë e virusit teksa kohët e fundit edhe në Shtetet e Bashkuara ka pasur një rritje të konsiderueshme të rasteve të reja.

Presidenti u shtrua në spital për një kohë të shkurtër kur u diagnostikua me coronavirus. Bashkëshortja dhe djali i tij po ashtu rezultuan pozitiv në tetor.

Këshilltari i sigurisë kombëtare, Robert O’Brien, po ashtu ka qenë i infektuar ndërsa ish-kandidati presidencial i Republikanëve, Herman Cain, ndërroi jetë në korrik pasi mori pjesë në një prej tubimeve të Trump.

Lexoni gjithashtu

• ‘Ndihem i fuqishëm dhe do t’ju puth të gjithëve’, Trump i rikthehet fushatës pak pasi kaloi COVID-19
• Kryeministri bullgar Borissov rezulton pozitiv me COVID-19, vijojnë protestat për dorëheqjen e tij