Biden apel amerikanëve: Ju përgjërohem, mbani maskë që të kthehemi në normalitet

Presidenti i zgjedhur i Shteteve të Bashkuara, Joe Biden u bëri thirrje amerikanëve ditën e hënë që të veshin maskat mbrojtëse në mënyrë që të luftojnë pandeminë e koronavirusit. Biden ftoi amerikanët që të tregojnë patriotizëm, teksa bëri një mbledhje të Task-Forcës për hartimin e një strategjie për frenimin e krizës së shëndetit publik.

“Ju përgjërohem, mbani maskë! Bëjeni për veten tuaj, për fqinjin tuaj. Mbajtja e maskës nuk është qëndrim politik, por një mënyrë e mirë për të mbajtur vendin të bashkuar. Dua të jem shumë i qartë, qëllimi i mbajtjes së maskës nuk është që ta bëjmë jetën tuaj më të vështirë, por që t’i rikthehemi jetës normale”, tha Biden.

Ai tha se procesi i aprovimit të vaksinës së coronavirusit duhet të udhëhiqet nga shkenca, në mënyrë që publiku të ketë besim tek efikasiteti i saj. Ai paralajmëroi se Shtetet e Bashkuara kanë përpara një “dimër të errët” dhe se vaksina nuk do të jetë gati për disa muaj.

“Ne po përballemi ende me një dimër të errët. Në Shtetet e Bashkuara janë thuajse 10 milionë raste me COVID. Javën e kaluar ne kaluam kuotën e 120 mijë rasteve në ditë. Pra, infektimet po rriten, shtrimet në spitale po rriten dhe vdekjet po ashtu. Kjo krizë merr thuajse 1 mijë jetë amerikane në ditë, me 240 mijë vdekje deri tani”, u shpreh Biden.

Pandemia ka vrarë në Shtetet e Bashkuara mbi 247 mijë persona dhe ka lënë të papunë miliona të tjerë. Biden premtoi se administrata e tij do ta mposhtë koronavirusin dhe se Amerika do të ringrihet ekonomikisht më e fortë se më parë.