Europa implementon masat, lehtësimi i kufizimeve nga COVID-19 as pas ndërrimit të viteve

Vendet evropiane vazhdojnë të implementojnë bllokadat për të frenuar përhapjen e COVID-19, teksa po përballen me valën e dytë të infektimeve.

Në Britani, 26 mijë e 860 persona kanë rezultuar pozitivë ndaj testeve, duke e çuar totalin e rasteve me coronavirus në 1 milion e 344 mijë e 356. Ndërkohë, numri i vdekjeve në Mbretërinë e Bashkuar u rrit me 462 njësi, duke arritur në 51 mijë e 766 viktima.

Autoritetet në Gjermani nisën të zbatonin masa më të rrepta parandalimi dhe kontrolli që prej 2 nëntorit, për një periudhë 4-javore.

Ministri gjerman i Shëndetësisë, Jens Spahn deklaroi se pret që kufizimet të vazhdojnë edhe gjatë dimrit, pasi nuk ka gjasa që situata të normalizohet në dhjetor apo janar, edhe nëse infektimet bien.

Kancelarja Merkel do të mbajë një takim me kryeministrat e landeve gjermane ditën e hënë, për të parë nëse masat aktuale kanë pasur efekt.

Ndërkohë, Franca konfirmoi 32 mijë e 95 infeksione në 24 orët e fundit, duke e çuar totalin në thuajse 2 milionë të prekur, ndërsa shifrat e shtrimeve në spitale u përmirësuan.

Ndërkohë, numri i viktimave u rrit me 359 njësi në një ditë, duke arritur në 44 mijë e 246.

Italia nga ana tjetër regjistroi 37 mijë e 255 raste të reja me coronavirus dhe 544 vdekje në 24 orët e fundit, duke llogaritur në total 1 milion e 144 mijë e 552 infektime dhe 4 mijë e 683 vdekje.

Franco Locatelli, president i Këshillit të Lartë Shëndetësor, deklaroi se masat e parandalimit dhe kontrollit po japin efekt, por rreziku i transmetimit të virusit është ende i lartë, ndaj dhe masat kufizuese nuk duhet të lehtësohen as përpara dhe as pas Vitit të Ri.

Lexoni gjithashtu:

Vala e rrezikshme e COVID, Greqia mbyll shkolla, Italia e Gjermania gati masat e reja kufizuese

Edhe Suedia në shtetrrethim, autoritetet pranojnë se teoritë mbi imunitetin e masës ishin të gabuara

COVID-19, Austria ashpërson masat, vendimi i ri kancelarit Sebastian Kurz