Gjermania legjitimon kufizimet. Bundestagu miraton ligjin pavarësisht protestave

Ligjvënësit gjermanë votuan në favor të draftit që kthen në ligj kufizimet e parashikuara për të vënë nën kontroll përhapjen e COVID-19.

Miratimi erdhi pavarësisht protestave kundër distancimit social, mbajtjes së maskave dhe mbylljes së dyqaneve.

Ministri i Shëndetësisë Jens Spahn mbrojti masat.

“Të ngresh zërin, të kundërshtosh, apo dhe të mohosh situatën është dhe duhet të jetë e mundur në një vend të lirë. Por ata që ngrenë zërin nuk kanë të drejtë dhe nuk janë shumica vetëm sepse bërtasin”, deklaroi Spahn.

Ministri shtoi se rritja e shifrave të infeksionit ka çuar në rritjen e punës në repartet e terapisë intensive dhe situata po del nga kontrolli.

Ndërkohë, topa uji u përdorën kundër manifestuesve në Berlin, pasi disa mijëra qytetarë injoruan thirrjet për të mbajtur maskë.

Selia e qeverisë së vendit u rrethua nga policia për arsye sigurie dhe persona të shumtë u arrestuan jashtë monumentit të Portës së Brandenburgut.

Protestuesit ishin nga e majta dhe e djathta ekstreme dhe mes tyre kishte familje dhe studentë.