Kryeministri izraelit, Benjamin Netanyahu rizgjidhet në krye të partisë Likud 

Kryeministri izraelit, Benjamin Netanyahu ka shpallur fitoren në zgjedhjet për lidershipin e partisë së tij Likud. Rreth 49 për qind e 116 mijë anëtarëve me të drejtë vote të partisë votuan ditën e enjte.

Rezultatet zyrtare të publikuara treguan se Netanjahu ka marrë 41 mijë e 792 vota, ose 72 për qind krahasuar me 15 mijë e 885 vota, ose 23 për qind të mara nga rivali Gideon Sa’ar.

“Një fitore masive! Faleminderit anëtarëve të Likud për besimin, mbështetjen dhe dashurinë. Me vullnetin e Zotit do ta udhëheq partinë në një fitore të madhe në zgjedhjet e ardhshme”, deklaroi Netanjahu në Twitter.

Zgjedhjet e brendshme në parti shiheshin si një test për pushtetin e liderit të vjetër, në një kohë kur vështirësitë janë shtuar.

Netanjahu po përballet me një gjyq për korrupsion, si dhe me zgjedhjet e treta të përgjithshme brenda vitit.

Zgjedhjet e mëparshme të mbajtura në prill dhe shtator panë partinë Likud të bllokohej me partinë e qendrës Bardheblu, me asnjë prej tyre në gjendje për të formuar qeverinë.