Konsum dhe eksport, ekonomia evropiane rritje rekord në tremujorin e tretë të vitit

Ekonomia në Eurozonë regjistroi rritjen më të lartë në tremujorin e verës, duke u rikthyer pas një kontraktimi rekord të shkaktuar nga pandemia e COVID-19, me shpenzimet e konsumatorëve dhe eksportet që u rritën ndjeshëm.

Eurostat deklaroi se prodhimi i brendshëm në bllokun 19-anëtarësh u rrit me 12.5% në periudhën korrik-shtator, që është dhe rritja më e lartë që kur agjencia nisi mbledhjen e të dhënave në vitin 1995.

Krahasuar me 3-mujorin e tretë të 2019-s, para pandemisë, ekonomia u kontraktua.

Rritja në verë u udhëhoq nga konsumi i brendshëm dhe eksportet, me dyqanet dhe fabrikat që rihapën dyert pas bllokadave.

Franca me 18.7%, Spanja me 16.7% dhe Italia me 15.9% regjistruan rritjet më të larta të GDP-së krahasuar me tremujorin paraardhës. Këto vende ishin gjithashtu mes atyre ekonomikisht më të dëmtuara nga COVID-19.

Ndërkohë, punësimi në Eurozonë u rrit me 1% në tremujorin e tretë, pas një rënieje prej 3% në të dytin, saktësoi Eurostat, duke rishikuar parashikimet e mëhershme për periudhën korrik-shtator.

Edhe pse situata është më keq se vitin e kaluar, të dhënat e Eurostat japin shpresë se rikuperimi mund të jetë më i shpejtë kur pandemia të marrë fund.