Kryeministri grek njofton nisjen e vaksinimeve kundër COVID-19 më 27 dhjetor

Greqia pritet të nisë vaksinimet kundër COVID-19 më 27 dhjetor, deklaroi Kryeministri Kyriakos Mitsotakis gjatë ditës së premte.

Vendet anëtare janë në pritje të miratimit të Agjencisë Europiane të Barnave (EMA) për vaksinën e prodhuar nga kompania amerikane Pfizer & BioNTech

Mitsotakis tha se në bazë të përditësimeve më të fundit nga EMA, vaksina e Pfizer pritet të miratohet më 22 dhjetor.

Vaksinat e para do të mbërrijnë në Greqi më 26 dhjetor ndërsa vaksinimi do të fillojë ditën e nesërme, në pesë spitalet e Athinës si dhe Selanik, deklaroi kryeministri grek.

Të parët që do e marrin vaksinën janë stafi shëndetësor si dhe qendrat rezidenciale të moshuarve.

“Kur vaksinimi të jetë kryer do të jenë radhët e fundit të epilogut të kësaj beteje të madhe kundër pandemisë, dhe do të jetë preludi i një epoke të re sigurie dhe prosperiteti, për të cilën jam i sigurt që do të agojë sapo të lejmë pas këtë aventurë të paprecedente”, tha Mitsotakis.

Greqia është aktualisht në karantinë që pritet të zgjasë deri më 7 janar, me orë policore në mbrëmje dhe ndalim qarkullimi ndër rrethe. Masat janë në fuqi qysh prej nëntorit, si pasojë e vazhdimit të rritjes së rasteve.

Të enjten, Greqia raportoi 1.115 raste të reja, duke e çuar numrin total të rasteve që prej fillimit të pandemisë në 128.710, ndërsa 3.948 persona kanë humbur jetën për shkak të komplikacioneve të virusit.

Lexoni gjithashtu 

• Varhelyi: Po punojmë që Ballkani t’i ketë vaksinat për Covid-19 në kohën e duhur
• Shqiptari i parë që bën vaksinën anti-COVID, apeli i mjekut Arjet Gega në SHBA
• COVAX në rrezik, shtetet e varfra rrezikojnë të mbesin pa vaksinë deri në vitin 2024