Ekonomia u tkurr 3.5% në verë, turizmi e tregtia në pikiatë, lulëzojnë ndërtimi dhe shitja e pronave

Pavarësisht lehtësimit të masave, gjatë periudhës korrik-shtator, ekonomia shqiptare sërish performoi me vlera negative, ndonëse me ritme më të zbutura se në tremujorin e mëparshëm, kur vendi ishte në izolim.

Të dhënat e publikuara nga INSTAT, tregojnë se Produkti i Brendshëm Bruto, në 3-mujorin e tretë vlerësohet me rënie prej 3,47%, kundrejt të njëjtës periudhë të vitit 2019. Ndërkohë, në tremujorin e dytë rënia ishte 10.2%. Për 9- mujorin, sipas të dhënave paraprake, ekonomia ka rënë rreth 5.3%.

Konsumi i dobët ka ndikuar në rënien e ekonomisë, ndërsa dy sektorët që nuk po njohin krizë, janë ndërtimi dhe pasuritë e paluajtshme.

Kjo e fundit shënoi rritje dhe në tremujorin e dytë të viti, ndonëse vendi ishte në mbyllje totale. Në rritje ishte shëndetësia, që reflektoi shpenzimet pas pandemisë, ndërsa bujqësia ngeli në stanjacion. 

Sipas INSTAT, në rënien e tremujorit të tretë, Negativisht kontribuuan edhe Tregtia, Transporti, Akomodimi, Shërbim ushqimor, argëtimi etj. Zyrtarisht, Shqipëria ndodhet në recesion prej 1 viti. Për vitin 2020, qeveria parashikon një rënie prej 6,3%, ndërsa për vitin e ardhshëm pret një rritje ekonomike prej 5,5%.

 Ecuria e PBB-së (2020)

-2.5                   -10.2                                         -3.5

Janar-Mars       Prill-qershor                              Korrik-shtator