Një këngë për Krishtlindjen, Muzeu i Charles Dickens mirëpret festën e dashur për autorin

Rruga “48 Doughty” është gati për festat e fundvitit. Kjo ishte dikur shtëpia e Charles Dickens dhe familjes së tij dhe është vendi ku autori shkroi disa prej librave të tij më të famshëm, përfshi Oliver Twist dhe Nicholas Nickleby.

Pas derës kryesore, sallat janë zbukuruar për festa. Ndërtesa historike ka përqafuar shpirtin e Krishtlindjes, në stilin e Dickens. Ishte një periudhë që vetë autori e donte.

Dhe këtë Krishtlindje, ajo histori po tregohet brenda vetë mureve të muzeut. Aktori Dominic Gerrard, me ndihmën e një kukulle, ka regjistruar një përshtatje, duke përdorur dhomat autentike viktoriane për të performuar në çdo skenë.

“Gjëja më e bukur e Këngës së Krishtlindjes është se njeh vështirësitë e jetës dhe njëkohësisht, kërkon që ne të mos biem në atë gjendje. Dhe mendoj se ajo me çfarë po përballemi tani në botë, është historia perfekte sipas të cilës duhet të përpiqemi të jetojmë.”

Vetë muzeu ka kaluar një vit të vështirë. Është detyruar të mbyllet dy herë për shkak të kufizimeve të izolimit kombëtar në Mbretërinë e Bashkuar gjatë pandemisë. Në mes të dhjetorit, muzeu mbylli dyert për herë të tretë, kur u vendosën kufizime pas shtimit të rasteve me Covid-19 në Londër.

Por drejtorja e muzeut pret më shumë vështirësi vitin e ardhshëm, kur Mbretëria e Bashkuar largohet nga Bashkimi Evropian.

“Brexit do jetë sfidë për ne. Çfarëdo të ndodhë, Dickens është kaq i njohur në mbarë botën, aq sa ishte edhe kur ishte gjallë. Ne mirëpresim vizitorë nga mbarë Evropa. Dhe shpresojmë që kjo të mos ndryshojë. E kuptoj se do ketë përçarje, por shpresojmë se dashuria për Dickensin ende do të sjellë njerëz në Londër dhe në këtë muze”, tha Cindy Sughrue, drejtore e Muzeut Charles Dickens.

“Kënga e Krishtlindjes” u publikua për herë të parë në 1843. Tani po transmetohet online gjatë periudhës së Krishtlindjes.

Performanca e parë u mbajt në 17 dhjetor, e radhës në 20 dhe e fundit është parashikuar në datën 31. Biletat kushtojnë 15 paund për pajisje dhe produksioni i regjistruar ndiqet nga një sesion pyetje-përgjigjesh me Gerrardin dhe një të ftuar special.