Përhapet mutacioni i Covid-19 në disa shtete evropiane

Disa shtete evropiane kanë konfirmuar raste të të infektuarve me mutacionin e ri të coronavirusit që ka shpërthyer në Mbretërinë e Bashkuar.

Spanja dhe Suedia janë dy nga vendet e fundit të cilat kanë identifikuar rastet e para të versionit të ri që sipas të dhënave të zbardhura nga studiuesit është më i transmetueshëm.

Edhe vende të tjera si Franca, Gjermania, Italia, Danimarka dhe Holanda kanë raportuar raste të këtij mutacioni të COVID-19 gjatë ditëve të fundit. Nuk përjashtohet edhe kryeqyteti I Spanjës I cili ka konfirmuar 4 raste me variacionin e ri të coronavirusit.

Të gjithë këta persona të infektuar mendohet të jenë kthyer nga Britania. Pavarësisht mobilizimit të më shumë se 40 shteteve në mbarë botën të cilat mbyllën kufijtë me Britaninë e Madhe, infektimet kanë vazhduar të shtohen.

 Ekspertët britanikë kanë bërë me dije se ky mutacion I ri duket se është 70 për qind më i transmetueshëm, gjë që ka shqetësuar çdo vend në kontinentin evropian.    

Kjo situate ka nxitur gati të gjitha qeveritë që të vendosin kufizime të ashpra për të parandaluar zgjerimin e jo vetëm COVID-19, por edhe variacioneve që ka pësuar gjatë rrugës.

Ndërsa disa vende evropiane kanë filluar vaksinimin masiv të popullsisë kundër COVID-19, nuk dihet nëse ky mutacion do të ndikojë në ecurinë dhe efektivitetin e vaksinave anticovid të prodhuara në kohë rekord.

SARA ARENA