“Nëse nuk na ndihmojnë do të vdesim”, emigrantët në Bosnje të kërcënuar nga i ftohti

Disa qindra emigrantë mbetën të bllokuar në një kamp të djegur në Bosnje, teksa dëbora mbuloi vendin dhe temperaturat ranë papritur nën zero si pasojë e motit të keq.

Emigrantët në kampin e lokalitetit Lipa, në veri-perëndim të vendit, përdorën batanije dhe jorganë për t’u mbrojtur nga acari.

“Po jetojmë si kafshët. Edhe kafshët jetojnë më mirë se ne, ndaj i kërkoj OKB-së dhe organizatave të tjera që të na ndihmojnë. Sepse nëse nuk na ndihmojnë do të vdesim”, tha një emigrant nga Pakistani.

Një zjarr i rënë më herët gjatë javës shkatërroi pjesën dërrmuese të kampit në qytetin Bihac, që ishte kritikuar nga zyrtarët ndërkombëtarë për kushte të papërshtatshme për emigrantët dhe refugjatët, që llogaritet të jenë rreth 1 mijë. Bosnja është kthyer në një nga rrugët kryesore për emigrantët që duan të arrijnë Perëndimin.