Kina dënon me katër vite burg gazetaren e pavarur që raportoi situatën e pandemisë në Wuhan

Një gazetare e pavarur në Kinë, e cila mbuloi pandeminë e coronavirusit në Wuhan u dënua të hënën me katër vite burg.

Zhang Zhan, një ish-avokate 37-vjeçare, u dënua pasi një gjykatë në Shanghai e akuzoi për “nxitje trazirash në vend”, një akuzë që ngrihet shpesh kundër aktivistëve dhe kritikëve të regjimit kinez.

“Pas njoftimit të dënimit, ajo ishte e dëshpëruar”, tha avokati i saj për AFP.

Gjykata e akuzoi Zhang për shpërndarje informacioni të rremë në internet, pasi në artikujt e saj ajo denonconte masat e marra në Wuhan kundër pandemisë duke i quajtur si “shkelje të rënda të së drejtave të njeriut”.

Në Kinë është diçka e zakonshme që aktivistët dhe kundërshtarët e regjimit të dënohen nga qeveria, pasi në vend nuk ka shtyp dhe media të lirë.

Dhjetëra diplomatë dhe mbështetës të Zhang tentuan të hynin brenda gjykatës, por policia ndërhyri duke i shtyrë ata jashtë godinës.

Sipas aktakuzës, Zhang udhëtoi nga Shanghai për në Wuhan në shkurt, në kohën kur në qytet kishte shpërthyer pandemia, duke raportuar mbi situatën e vendit nëpër rrjetet sociale, përfshirë edhe kaosin nëpër spitale.

Qyteti i Wuhan, i përbërë nga 11 milionë banorë, raportoi zyrtarisht për 4000 viktima nga COVID-19, ndërsa Kina ka raportuar gjithsej për 4,634 viktima në periudhën e janarit deri në maj.

Numri zyrtar i viktimave nuk ka ndryshuar që prej asaj periudhe.

Lexoni gjithashtu:

Trump nënshkruan paketën e ndihmës financiare post-COVID-19

Kreu i OBSH: COVID-19 nuk do të jetë pandemia e fundit në botë

Evropa nis vaksinimin, në Itali, Spanjë, Gjermani dhe Austri bëhen injeksionet e para