Rritja e infektimeve me COVID-19 në Evropë, zgjaten masat kufizuese në disa shtete

Spanja po zhytet në një valë të tretë të pandemisë së koronavirusit dhe spitalet e vendit kanë filluar të vuajnë mbingarkesën.

Që nga nisja e pandemisë në vend u shënua një rekord prej gati 39 mijë të infektuarish në 24 orë dhe numri i njerëzve në njësitë e kujdesit intensiv që nga 24 dhjetori është rritur me 39% .

Ministri i shëndetësisë u kërkoi njerëzve të respektojnë masat e miratuara nga secili rajon autonom.

“U kërkoj njerëzve që të respektojnë me përpikëri masat e vendosura nga secili rajon autonom. Është e vetmja mënyrë që kemi për të kontrolluar virusin”, tha ai.

Me një popullsi prej 47 milion banorësh Spanja filloi vaksinimin në fund të dhjetorit. Qeveria qendrore deri më tani ka shpërndarë mbi një milion doza në 17 rajonet e  vendit.

Edhe  Britania e Madhe vijon të raportojë nivele të larta të të infektuarve dhe të viktimave. Ekspertët e Shëndetit Publik e kanë përshkruar situatën si shenjë të një “dështimi fenomenal të politikës dhe praktikës së ndjekur.

Qeveria e Mbretërisë së Bashkuar dhe në veçanti Kryeministri Boris Johnson po vihet nën presion. Gjatë një komiteti parlamentar ai ishte i paqartë në lidhje me reagimin  e qeverisë ndaj varianti të ri COVID-19  shfaqur në Brazil.

“Ne jemi duke ndërmarrë hapa për të ndaluar që varianti i Brazilit të importohet. Kemi marrë hapa për të ndaluar që varianti i Afrikës së Jugut të importohet në këtë vend, pasi në të vërtetë Francezët morën hapa për të ndaluar që varianti Kent të importohej në Francë. Dhe kjo është ajo që bëjnë shtetet”, u shpreh Boris Johnson, kryeministër i Britanisë së Madhe.

Edhe  në vendin fqinj  Itali, autoritetet vendosën të zgjasin gjendjen e emergjencës deri në fund të prillit, pasi infeksionet nuk tregojnë shenja uljeje. Do te vijojnë te ndalohen deri ne mars lëvizjet mes rajoneve. Gjendja e jashtëzakonshme, e cila do të përfundonte  në fund të janarit, i jep pushtet më të madh qeverisë qendrore.

Portugalia po ashtu po përballet me një izolim të ri Covid-19 i cili hyn në fuqi nga e premtja.

“Rregulli kryesor është, qëndroni në shtëpi. Secili prej nesh duhet ta zbatojë këtë rregull, në mënyrë që të mbrojë të tjerët dhe veten, vetëm atëherë do të fitojmë luftën kundër pandemisë”, tha Antonio Costa, kryeministër i Portugalisë.

Ekspertët e shëndetit thonë se mund të duhen tetë javë para se normat e infeksionit të bien në nivelet e para Krishtlindjes.

Lexoni gjithashtu:

Në Britani mbi 100 mijë të vdekur, në Rusi nis vaksinimi në masë

Vendet e BE zgjasin masat kufizuese, Italia në gjendje emergjence deri më 30 prill