Tjetër vaksinë rezulton efikase në testet kundër COVID-19

Në Britaninë e Madhe një tjetër vaksinë anti-Covid ka treguar rezultate të kënaqshme në fazën e tretë të provave.

Vaksina e kompanisë amerikane Novavax ka treguar efektshmëri deri në 89.3% dhe është e para vaksinë që po provon të jetë efikase edhe ndaj varianteve të reja të COVID-19 të pikasura në Britani të Madhe dhe Afrikë të Jugut.

Varianti i ri i virusit mendohet të jetë më ngjitës se sa varianti fillestar që buroi nga Kina dhe shkaktoi pandeminë.

Studimi i efekteve të vaksinës Novavax në fazën e tretë të zhvillimit me një kampion prej rreth 15 mijë personash në Britani vijon. Kjo fazë ka marrë në shqyrtim grup-mosha nga 18-84 vjeç, ku 27 për qind e tyre ishin mbi 65-vjeçarë.

Kompania amerikane thotë se ka të dhëna se ndaj variantit fillestar të COVID-19 vaksina mund të jetë afërsisht deri në 96% efektive, ndërsa për variantet e reja deri në 86%.

Mirëpo në rastin e studimit të variantit nga Afrika e Jugut efektshmëria ka rezultuar në studim rreth 60%.

Zakonisht hulumtimet dhe testimet për vaksinat kërkojnë kohë dhe studime të gjata klinike, por në vitin 2020 pandemia nxiti një garë mes komunitetit shkencor për të prodhuar sa më shpejt një vaksinë efektive.

Aktualisht rreth 67 lloje vaksinash janë në fazën e studimeve klinike në njerëz, 20 prej tytre kanë arritur në fazën finale, që është faza e tretë dhe parashikon testimin në një grup më të gjerë vullnetarësh.

Momentalisht në vende të ndryshme të botës rreth 5 vaksina janë aprovuar për përdorim të gjerë apo vetëm për rastet emergjente – Pfizer-BioNTech, Moderna, Sputnik V, Oxford-AstraZeneca, Sinovac.