BE aprovon ‘AstraZeneca’, publikohet kontrata

Vaksinimi i tretë që Bashkimi Evropian ka autorizuar për 27 vendet anëtare është sërish ajo e “AstraZeneca”. Agjencia Evropiane e Medikamenteve ka aprovuar vaksinën anglo-suedeze kundër COVID-19 për të gjitha grup moshat mbi 18 vjeç. Agjencia thotë se po monitoron nga afër sigurinë dhe efikasitetin e vaksinës.

“Ne nuk kemi ende të dhëna nëse vaksinat e “AstraZeneca” ofrojnë mbrojtje nga variantet e reja, por kemi kërkuar që kompania ta hetojë këtë sikurse e kemi kërkuar edhe për vaksina të tjera”, tha Emer Cooke, drejtoreshë ekzekutive e AEM-së.

Aprovimi vjen teksa BE dhe “AstraZeneca” janë përfshirë në një debat për ndërprerjen e furnizimeve. Komisioni Evropian publikoi një kontratë të redaktuar, që në faqen e 11-të thotë se “AstraZeneca” duhet të bëjë “përpjekjet maksimale të arsyeshme” për të prodhuar vaksinën në pikat e saj që ndodhen në vendet e Unionit.

Por një avokat belg tha për Euronews se terminologjia “përpjekjet maksimale të arsyeshme” lë vend për interpretime.

“E gjitha kjo ka të bëjë me interpretimin e “përpjekjeve maksimale të arsyeshme”, duke u nisur nga fabrikat e prodhimit që “AstraZeneca” ka në vendet e BE-së, përfshirë ato në Mbretërinë e Bashkuar që janë të pranishme në klauzolën e kontratës. Ndaj është një pyetje me kleçkë nëse, në implementimin e kontratave, kompania ka bërë me të vërtetë përpjekjet maksimale për të furnizuar BE-në”, u shpreh Geert Van Calster, avokat, Belgjikë.

Kompania farmaceutike ka paralajmëruar se vetëm 25% e 100 milionë dozave do të shpërndahen në bllokun evropian në tremujorin e parë të vitit.