Hetuesit e OBSH mbërrijnë në Kinë për të vizituar spitalin e Wuhanit

Një ekip hetuesish nga Organizata Botërore e Shëndetësisë, e cila po heton origjinën e pandemisë së coronavirusit, ka kryer një vizitë në një prej spitaleve të Wuhanit ku janë trajtuar disa prej pacientëve të parë me COVID-19

Spitali Jinyintan ishte ndër të parët që ka trajtuar pacientët e infektuar me coronavirus në fillim të vitit që lamë pas.

“Sapo u kthyem nga vizita në spitalin Jinyintan, i specializuar në sëmundje infektive dhe dedikuar për trajtimin e rasteve të para në Wuhan”, tha virologu holandez Marion Koopmans në Twitter. “Histori mjaft të ngjashme me ato që kemi dëgjuar nga mjekët e pavijoneve të terapisë intensive në spitalet tona”. 

Just back from visit at Jinyintan hospital, that specialised in infectious diseases and was designated for treatment of the first cases in Wuhan. Stories quite similar to what I have heard from our ICU doctors.

— Marion Koopmans (@MarionKoopmans) January 30, 2021

Ekipi u takua për herë të parë me mjekët kinezë të premten, përpara se ekspertë në shëndetin e kafshëve dhe virologjisë vizituan një tjetër zonë të rëndësishme Spitalin e Hubeit.

“Të dhëna të rëndësishme”

OBSH deklaroi të enjten në Twitter se një ekip do të vizitojë spitalet, tregjet ushqimore, pazarin e peshkut ku u shfaqën rastet e para, Institutin e Virologjisë së Wuhanit dhe laboratorë të ndryshëm, përfshi këtu dhe Qendrën për Kontrollin dhe Parandalimin e Sëmundjeve.

OBSH u shpreh se ekipi ka kërkuar “të dhëna të detajuara” dhe do të bisedojë me disa prej mjekëve që kanë trajtuar pacientët e parë.

Misioni ka marrë nota politike, pasi Kina kërkon të shfajësohet prej disa akuzash që ka ndjekur hapa të gabuar në fillimet e pandemisë.

Megjithatë, një vizitë e vetme nga shkencëtarët nuk ka të ngjarë që të konfirmojë origjinën e virusit. Konfirmimi se prejardhja mund të jetë nga një kafshë e caktuar kërkon një hetim të thellë që mund të zgjasë vite të tëra, përfshi këtu analiza gjenetike dhe studime epidemiologjike.

Lexoni gjithashtu 

• Shtohen kufizimet në Europë, Franca dhe Gjermania mbyllin kufijtë, Britania rëndon gjobat
• Gara e vaksinave, ‘sherr’ mes BE-së dhe Britanisë, “Johnson & Johnson” hyn në lojë
• BE aprovon ‘AstraZeneca’, publikohet kontrata