OKB: 27 mijë të mitur duhet të riatdhesohen nga kampet e Sirisë

Shefi i departamentit të antiterrorit i Kombeve të Bashkuara i ka bërë thirrje shteteve të riatdhesojnë 27 mijë të mitur të bllokuar në kampet masive në Sirinë verilindore, shumë prej të cilëve fëmijë të ekstremistëve islamikë që dikur kontrollonin territore të mëdha në Irak dhe Siri.

Vladimir Voronkov u shpreh gjatë një mbledhjeje të Këshillit të Sigurisë së OKB se “situata e tmerrshme në të cilën ndodhen fëmijët në kampin Al Hol është një prej problemeve që duhen zgjidhur sa më shpejt në ditët e sotme”.

Al Hol, kampi më i madh i refugjatëve dhe të zhvendosurve sirianë në vend, strehon aktualisht 62 mijë persona, sipas zyrtarëve të OKB, ndërsa më shumë se 80 për qind e tyre janë gra e fëmijë.

Voronkov tha se fëmijët vijnë nga 60 shtete të ndryshme e janë përgjegjësi e vendeve anëtare, jo e Sirisë apo grupeve që kontrollojnë kampet. Luftëtarët kurdë mbikëqyrin kampin Al Hol si dhe burgjet ku qëndrojnë mijëra luftëtare të ISIS.

Ai tha se një sërë shtetesh, përfshi Rusia dhe Kazakistani, kanë riatdhesuar rreth 1 mijë të mitur dhe familjarët e tyre.

Voronkov tha se po punohet për të shkruar një raport mbi eksperiencën e të kthyerve, por me të dhënat që kanë deri tani “shqetësimet për kanosjen e sigurisë kombëtare janë të pabaza”.

“Fëmijët duhet të trajtohen si viktima”

Drejtori ekzekutiv i Qendrës së Antiterrorit i OKB theksoi se fëmijët “duhet të  trajtohen si viktima”, ndërsa të rinjtë nën moshën 14-vjeçare nuk duhen arrestuar ose dënuar.

Historia ka treguar se fëmijët e marrin veten shpejt dhe mund të shërohen nga eksperienca të dhunshme nga e kaluara nëse marrin mbështetjen e duhur dhe riintegrohen në shoqëri, tha Voronkov.

“Duhet bërë çdo përpjekje që fëmijët të mos mbahen në institucione por të lejohet riintegrimi në komunitet”, tha ai.

Lexoni gjithashtu 

• Një muaj më parë u riatdhesua, Anti-Terrori merr në pyetje Floresha Rashën për qëndrimin në kampin Al Hol
• Video ekskluzive | Euronews Albania siguron pamje brenda kampit Al-Hol nga ku u evakuuan pesë shqiptarët
• 11-vjeçari Alvin lirohet nga kampi i refugjatëve ‘Al Hol’ në Siri