BE, “luftë” për vaksinat, programet e vaksinimit do të rinisin pas 15 shkurtit

Një vit pas fillimit të pandemisë, programet e vaksinimit ofrojnë shpresë, por shumë nga vendet evropiane tashmë kanë mungesa të vaksinave. Duke filluar që nga Madridi në Paris, në Bruksel dhe Berlin, programet e vaksinimit janë pezulluar.

Por, pas një jave të vështirë, Komisioni Evropian dha disa lajme të mira sot.

“Kompania Pfizer/Biontech pritet që të shtojë dërgesat e vaksinave duke filluar nga 15 shkurti si dhe do të ketë 75 milionë doza vaksinash më shumë në tremujorin e dytë të këtij viti. Shtesa prej 75 milionë vaksinash do ta çojë numrin e përgjithshëm të vaksinave Pfizer/BionTech në 600 milionë gjatë vitit 2021”, tha presidentja e Komisionit Europian, Ursula Von der Leyen.

Por kjo nuk mjaftoi për të ulur presionin dhe kriticizmin ndaj lidershipit të Ursula Von Der Leyen.

Gjatë fundjavës së kaluar, Presidentja e Komisionit Evropian u takua me përfaqësues të firmave të mëdha farmaceutike në një përpjekje për të rregulluar problemin e mungesës së vaksinave për vendet e bllokut evropian. Megjithëse AstraZeneca premtoi 9 milionë doza më shumë, kjo është vetëm gjysma e asaj që kompania kishte premtuar me marrëveshjen paraprake. 

Ministri i Shëndetësisë i Gjermanisë, Jens Spahn, deklaroi se qeveria e vendit të tij nuk do të ketë asnjë kufizim në përdorimin e vaksinave, mjafton që ato ti shpëtojnë jetën njerëzve

“Nuk do të ketë pengesa për përdorimin e vaksinës ruse Sputnik V dhe atë kineze Sinopharm nëse ato merrnin aprovimin e BE-së. Ne do të bëjmë çdo gjë që tu shërbejmë njerëzve, pavarësisht se ku janë prodhuar vaksinat”, u shpreh ministri gjerman i Shëndetësisë.

Kompania Pfizer dhe BioNTech tha në një deklaratë që kishte arritur të modifikonte proceset e saj të prodhimit në Evropë dhe do të fillonte prodhimin duke filluar nga muaji shkurt.

Të dyja kompanitë tani shpresojnë të prodhojnë 2 miliard doza gjatë vitit 2021, nga 1.3 miliardë që ishte planifikuar më parë.