Paratë jashtë bankave, në fund të 2020 qarkulluan 2.8 miliardë euro

Në fund të vitit 2020, sipas statistikave të publikuara nga Banka e Shqipërisë, jashtë sistemit bankar qarkullonin 344 miliardë lekë ose 2.8 miliardë euro.

Të dhënat tregojnë se në 2020-n, është shënuar rritja më e fortë vjetore, me 53 miliardë lekë, ose +18% me shumë, që nga viti 2002, kur Banka e Shqipërisë e raportoi këtë tregues.

Ky është niveli më i lartë që nga dhjetori 2008, kur u shënua një valë tërheqjesh të depozitave në atë kohë, si rrjedhojë e frikës së shkaktuar nga kriza financiare globale.

Pasi kishte filluar uljen pas 2009-s, paraja jashtë bankave ka pasur tendencë rritëse që prej vitit 2013.

Që nga fundi i shkurtit, përpara se të fillonte pandemia ky tregues është rritur me 450 milionë euro ose me 19%.

Të dhëna të INSTAT tregojnë se transaksionet e pasurive të paluajtshme shënuan një nivel rekord për 9 muajt e vitit.

Aktorët e tregut pohojnë se më shumë se gjysma e këtyre transaksioneve kryhen me para cash.

Për 9-mujorin, transaksionet e pasurive të paluajtshme arritën në rreth 612 milionë euro duke shënuar sërish rekord për periudhën në fjalë, që nga viti 2009.

Niveli i parasë jashtë bankave prej gati 24% të totalit është shumë më i lartë se i mesatares se Bashkimit Europian dhe në rajon.

Në Eurozonë, sipas të dhënave nga Banka Qendrore Europiane, niveli i parasë jashtë bankave ishte rreth 9% e totalit.

Edhe në rajon ky tregues është më i ulët se 10%.