Përvjetori i masakrës së Parkland, Biden kërkon ashpërsimin e ligjit për armët

Në përvjetorin e tretë të masakrës në gjimnazin në Parkland, ku 17 persona humbën jetën, presidenti i Shteteve të Bashkuara ka kërkuar ashpërsimin e ligjit të armëve.

“Brenda disa sekondash, jetët e dhjetëra familjeve dhe jeta e një komuniteti amerikan, ndryshoi tërësisht,” shprehej Biden në një deklaratë, ku ai i kërkonte Kongresit të forcojë ligjin, duke përfshirë një kontroll të historikut të armëve të shitura dhe ndalimin e armëve automatike.

Nuk ka kohë për të humbur, thotë presidenti. “I detyrohemi atyre që kemi humbur dhe atyre që vajtojnë të bëjmë ndryshimin. Koha për të vepruar është tani.”

Gjatë viteve, dhuna vdekjeprurëse në shkolla ka tronditur Shtetet e Bashkuara, por asnjë nga ngjarjet e regjistruara nuk ka çuar në nxjerrjen e ligjeve gjithëpërfshirëse për armët.

Të shtënat masive kanë nxitur përplasje mes përkrahësve të kontrollit ndaj armëve dhe ligjbërësve republikanë dhe aleatëve mbrojtës të Amendamentit të Dytë të Kushtetutës amerikane.

Mbetet ende për të parë çfarë do të ndryshojë në nivelin federal, pavarësisht faktit se demokratët kanë në kontroll Shtëpinë e Bardhë dhe të dy dhomat e Kongresit.