Morali i kandidimit të të akuzuarve nxit debat mes Denar Bibës dhe Agron Shehajt

Qëndrimi i kandidatit për deputet të Partisë Demokratike, Agron Shehaj, se ministrat e akuzuar për abuzime dhe trafik droge nuk duhet të përfshihen më në politikë, nxiti debate në emisionin “Ilva Now” në Euronews Albania.

Juristi Denar Biba i kërkoi kandidatit për deputet Shehaj, që të ishte korrekt në pretendimet që ngrinte për sa kohë nga ana ligjore nuk ka një vendim ndaj tyre. Mirëpo Shehaj u përgjigj se nga ana politike dhe morale përfshirja e tyre sërish në zgjedhje “është për t’u dënuar”.

“Mendoj se një ministër i akuzuar për [përfshirje në] trafik droge, pavarësisht se nuk dënohet, nuk duhet të kandidohet më,” – theksoi Shehaj, duke nënkuptuar ish-ministrin e Brendshëm Fatmir Xhafaj.

Biba u pajtua me Shehajn në gjykimin e tij për këtë çështje. Megjithatë ai kundërshtoi Shehajn duke kujtuar se në anën e opozitës ka plot raste ku politikanë të ndryshëm janë akuzuar për abuzime të rënda dhe pavarësisht këtyre ata vijojnë të jenë në politikë.

“Kolegë tuaj të PD-së gjithashtu janë hetuar dhe kanë mbyllur çështje me procedurë si për çështje ekonomike, ashtu edhe për problematika si ajo e 21 janarit, apo Gërdecit […] megjithatë ata njerëz janë në politikë,” – replikoi Biba duke nënkuptuar kryetarin e PD-së Lulzim Basha apo kryetarin e PR-së Fatmir Mediu.

Lexoni gjithashtu:

Krimet zgjedhore, Gerti Shella: Në 2017 ka pasur 64 procedime penale

Jonila Godole: Lista e kandidatëve të PS-së surprizuese vetëm në formë, jo në përmbajtje

“Gjiknuri duhet të ishte para drejtësisë”, Shehaj: Rama u paraqet njerëzve grupin e skuadrës së korrupsionit

Analiza e Denar Bibës: Sa vota i duhen Pandeli Majkos që të mos mbesë jashtë Parlamentit