‘Oppenheimer’ në Japoni, filmi mbi ‘babain’ e bombës atomike në kinemanë e Tokios

Filmi fitues i çmimit Oskar, “Oppenheimer”, më në fund u shfaq të premten në Japoni, ku subjekti i tij është një çështje tejet e ndjeshme dhe emocionale.

Filmi u shfaq në Shtetet e Bashkuara dhe shumë vende të tjera në korrik në të njëjtën kohë me “Barbie”, duke frymëzuar fenomenin viral të pagëzuar si “Barbenheimer” nga fansat.

Por, ndërsa “Barbie” u shfaq në Japoni në gusht, “Oppenheimer” qëndroi larg ekraneve të kinemasë për muaj me radhë.

Asokohe nuk u dha asnjë sqarim zyrtar, duke nxitur spekulimet se filmi ishte shumë kontradiktor për t’u transmetuar në Japoni, i vetmi vend që ka pësuar një sulm bërthamor në kohë lufte.

Rreth 140 mijë persona humbën jetën në Hiroshima dhe 74 mijë në Nagasaki, ku shtetet e Bashkuara hodhën bombën atomike në dy qytetet në vitin 1945, pak ditë përpara fundit të Luftës së Dytë Botërore.

Në një kinema të madhe në qendër të Tokios, ku “Oppenheimer” u shfaq të premten, nuk kishte asnjë material promovues, sikurse është e pritshme për një film të madh.

Aty ishte vetëm një poster i vogël që reklamonte filmin, që pati një buxhet prej 100 milionë dollarësh dhe që fitoi mbi 1 miliard në box office në mbarë botën.

LEXONI GJITHASHTU:

• Analisti: Izraeli do godasë me avionë qendrat ku përgatiten bombat atomike
• Raketa ndaj centralit atomik, dëmtohet impianti në Zaporizhia