Meta përballet me ankesa për të dhënat personale në Evropë

Një grup me bazë në Vjenë ngriti të enjten padi në 11 vende europiane kundër Meta-s, duke thënë se ndryshimi i planifikuar i politikës së privatësisë nga gjiganti teknologjik global do të lejojë përdorimin e paligjshëm të të dhënave personale për teknologjinë e inteligjencës artificiale.

Kjo vjen pasi Meta informoi përdoruesit e saj europianë për një ndryshim në politikën e saj të privatësisë që do të hyjë në fuqi nga 26 qershori.

Grupi tha se përmes politikës së saj të re të privatësisë planifikon të përdorë të gjitha të dhënat publike dhe jo publike të përdoruesve që ka mbledhur që nga viti 2007 dhe t’i shpërndajë ato me palë të treta.

“Kjo është qartësisht e kundërta e përputhshmërisë së rregullave”, tha themeluesi i Qendrës Europiane për të Drejtat Dixhitale, Max Schrems, duke iu referuar Rregullores së Përgjithshme të Mbrojtjes së të Dhënave të BE-së, e cila synon të bëjë më të lehtë për njerëzit kontrollin mbi mënyrën se si kompanitë përdorin informacionin e tyre personal.

Nëpërmjet padive, grupi kërkon nga autoritetet e mbrojtjes së të dhënave në 11 vendet europiane të ndalojnë politikën e re të privatësisë së Meta-s përpara se të hyjë në fuqi në fund të qershorit dhe të hetojnë plotësisht atë.

Grupi tha se planifikon të ngrejë padi në shtetet e tjera anëtare të BE-së në ditët në vijim.

LEXONI GJITHASHTU:

• Facebook dhe Instagram ;nën hetim nga BE, krijojnë varësi te të miturit
• Ndikimi rus| PE hetim për Instagram dhe Facebook, do verifikojë reklamat politike