Protesta kundër kufizimeve, manifestime në Gjermani, Francë, Zvicër dhe Rumani

Protestues që kundërshtojnë masat anti-COVID-19 mbushën të shtunën rrugët e kryeqytetit të Rumanisë, Bukuresht, teksa vendi përjetoi ditën e shtatë të demonstratave që kur kufizimet e reja hynë në fuqi të dielën e kaluar.

Rregullat e reja përfshijnë një shtetrrethim nga ora 21:00 dhe orare të shkurtra pazari.

Vendi i Evropës lindore aktualisht po lufton me valën e tretë të COVID-19 dhe gjatë javës ka regjistruar numrin më të lartë të pacientëve në repartet e terapisë intensive.

Protestat u kthyen në përleshje në St. Gallen të Zvicrës, pasi grupe të rinjsh sulmuan policinë. Bomba molotov, plumba gome dhe gaz lotsjellës u përdorën, ndërsa 19 persona u arrestuan.

Thirrja për tubim ishte bërë në rrjetet sociale dhe qindra të rinj morën pjesë në to.

Protesta më paqësore, por me më shumë njerëz u mbajtën në Shtutgart. Disa mijëra njerëz nga Gjermania u mblodhën atje për të demonstruar kundër masave kufizuese.

Ata iu përgjigjën thirrjes së disa shoqatave civile, që kanë organizuar tubimet më të mëdha kundër izolimit në Gjermani që nga nisja e pandemisë.

Ndërkohë, një grup artistësh protestuan gjysmë të zhveshur para Ministrisë së Kulturës në Paris, të zemëruar nga mbyllja e subjekteve kulturore si pasojë e pandemisë.