Irani akuzon Izraelin për sulmin në qendrën bërthamore “Natanz”

Ministri i Jashtëm iranian ka thënë se vendi i tij do të “hakmerret” për një sulm në uzinën bërthamore nëntokësore Natanz, për të cilin ka fajësuar Izraelin.

Zyrtarët iranianë thanë të dielën se impianti i pasurimit të uraniumit “Natanz” ishte shënjestër e “terrorizmit bërthamor”.

Izraeli nuk ka komentuar, por radioja publike citoi burimet e inteligjencës, duke thënë se bëhej fjalë për një operacion kibernetik “Mossad”. Ata thanë se kishte shkaktuar dëme më të mëdha sesa Irani ka raportuar deri tani.

Zyrtarët e inteligjencës amerikane thanë për New York Times se një shpërthim i madh kishte shkatërruar plotësisht sistemin e brendshëm të pavarur të energjisë që furnizonte centrifugat brenda uzinës nëntokësore. Ata lajmëruan se mund të duheshin të paktën nëntë muaj për të rifilluar me pasurimin e uraniumit.

Agjencia Nour News e Iranit, e cila është e lidhur me Këshillin e Lartë të Sigurisë Kombëtare, citoi një burim të Ministrisë së inteligjencës duke thënë se “autorët kryesorë” ishin identifikuar dhe po zhvillohej një operacion për arrestimin e tyre.

Problemi i parë elektrik u raportua ditën e shtunë në uzinën bërthamore Natanz të Iranit, një ditë pasi Teherani inauguroi centrifugat e reja më të avancuara, që pasurojnë më shpejt uraniumin.