Franca bëhet vendi i tretë në Europë që tejkalon 100 mijë viktima nga COVID-19

Franca është bërë vendi i tretë në Europën perëndimore që ka tejkaluar shifrën e 100 mijë viktimave nga COVID-19.

“Nuk do të harrojmë asnjë fytyrë, e asnjë emër”, tha Presidenti i Francës Emmanuel Macron.

“Që prej fillimit të pandemisë, 100 mijë gra e burra francezë kanë humbur betejën ndaj virusit. Të gjithë mendojmë për familjet e tyre, të dashurit e tyre, për fëmijët që kanë humbur një prind, apo gjysh, të afërmit dhe miqësitë e ndërprera”.

Depuis le début de la pandémie, cent mille Françaises et Français ont succombé au virus. Nous avons tous une pensée pour leurs familles, leurs proches, pour les enfants qui ont perdu un parent ou un grand-parent, les fratries endeuillées, les amitiés fauchées.

— Emmanuel Macron (@EmmanuelMacron) April 15, 2021

Italia dhe Mbretëria e Bashkuar janë të vetmet shtete në Europën perëndimore që e kanë tejkaluar pragun e 100 mijë fataliteteve nga COVID-19.

Në Francë është aktualisht në fuqi një shtetrrethim i pjesshëm, teksa ritmet e vaksinimeve janë cilësuar si të ngadalëta në krahasim me disa prej shteteve të tjera të BE.

Në masa përfshihet mbyllja e shkollave, ndalimi i udhëtimeve ndërqytetëse dhe mbyllja e të gjitha dyqaneve të cilësuara si jo esenciale.

Në mes të dhjetorit ka hyrë në fuqi dhe ora policore, ndërsa restorantet, baret, palestrat, kinematë dhe muzetë qëndrojnë të mbyllura që prej tetorit.

Shkollat pritet të rihapen në datën 26 prill, ndërsa qeveria ka paralajmëruar lehtësimin e masave nga mesi i majit.

Autoritetet kanë parashikuar që 20 milionë banorë, rreth 38 për qind e popullsisë së rritur të Francës, të ketë marrë të paktën një dozë të vaksinës deri në maj.

Franca ka raportuar numrin më të lartë të rasteve të konfirmuara me COVID-19 në mbarë Europën, mbi 5.2 milionë, ndërsa aktualisht numri i pacientëve në terapi intensive ka tejkaluar 5.900.

Lexoni gjithashtu

• Variantet e reja të COVID-19, Franca pezullon fluturimet me Brazilin
• Mbi 1 milion viktima nga COVID-19 në Europë
• Mbi 3 milionë raste me COVID-19 në Gjermani që nga fillimi i pandemisë, autoritetet mund të ashpërsojnë masat