Josep Borrell: Qasja e BE-së për integrimin nuk ndryshon  

Pasi përfundoi takimin me ministrat e punëve të jashtme të Bashkimit Europian lidhur me zhvillimet më të fundit në Ballkanin Perëndimor, shefi i diplomacisë europiane Josep Borrell u shpreh se qëndrimi i bllokut ndaj integrimit të rajonit nuk ka ndryshuar.

“Nuk mund t’ju flas për hapjen e kapitujve të negociatave. Ka pasur lajme për ndarjen e Shqipërisë dhe Maqedonisë së Veriut në procesin e integrimit, por qasja jonë mbetet e njëjta” u shpreh Borrell.

Ai njoftoi se i ka ftuar udhëheqësit e vendeve të rajonit të vizitojnë Brukselin javën e ardhshme, për të diskutuar situatën politike në Ballkanin Perëndimor.

Komisioneri për Zgjerimin në Bashkimin Evropian, Oliver Varhelyi, në një intervistë të dhënë për Euronews e la të hapur mundësinë, që Shqipëria mund të ndahet nga Maqedonia e Veriut, nëse kjo e fundit nuk arrin të kapërcejë veton e Bullgarisë.

“Kam shpresë se ne do të mund ta mbajmë konferencën e parë ndërqeveritare në Qershor të këtij viti. Nëse, përballemi sërish me vështirësi me Maqedoninë e Veriut që do të thotë, nëse jemi të pasuksesshëm në bindjen e Bullgarisë dhe Maqedonisë së Veriut që të arrijnë një zgjidhje të përbashkët, atëherë pyetja që ngrihet është, nëse mund të vazhdojmë para vetëm me Shqipërinë, dhe do të na duhet ta konsiderojmë atë pyetje. Mund të jetë një opsion, po”, tha mes tjerash Varhelyi.

Lexoni gjithashtu: 

Shqipëria mund të ndahet nga RMV për negociatat, konfirmon Komisioneri Varhelyi