Pas 11 ditë luftimesh, arrihet armëpushimi mes Izraelit dhe Hamasit

Izraeli ka bërë të ditur se ka arritur dakordësi për vendosjen e një armëpushimi ne konfliktin e armatosur me Hamasin, që zgjat prej 11 ditësh.

Arritja e armëpushimit, për shkak të presionit të fortë ndërkombëtar, dukej gjithnjë e më afër gjatë ditës së enjte. Burime të ndryshme treguan se përpjekja e ndërmjetësimit, e udhëhequr nga Egjipti dhe i dërguari i Kombeve të Bashkuara Tom Wenesland në Katar, dha rezultatin e dëshiruar.

Kabineti qeveritar në Izrael u mblodh gjatë ditës së enjte për të diskutuar ndaljen e ofensivës në Gaza, pas apelit të Presidentit amerikan Joe Biden. Edhe organizata islamiste, Hamas konfirmoi se është arritur një armëpushim me Izraelin që do të hyjë në fuqi në orën 02:00 të ditës së premte.