Flakët përfshijnë pyjet në Greqi e Spanjë, mijëra hektarë të djegur

Më shumë se 4 mijë hektarë pyje u shkatërruan nga zjarri që filloi natën e së mërkurës në njësinë rajonale të Korinthit, në Greqi dhe që u shtri në rajonin e Atikës, në perëndim të Athinës.

Deri në orët e vona të së premtes situata u përmirësua disi, por të gjitha forcat zjarrfikëse vazhduan punën për të shuar zjarret.

Mbi 450 efektivë dhe 123 makina zjarrfikëse, 18 avionë, një helikopter, si dhe disa njësi ushtarake u angazhuan për të shpëtuar botën e egër.

Ndërkohë, disa qindra punonjës të shërbimeve të emergjencës luftuan të premten me zjarret e mëdha që përfshinë pyjet në ishujt Kanarie.

Re të zeza tymi u ngritën në pyllin në Ariko, komuna e dytë më e madhe në Tenerife, pjesë e zinxhirit të ishujve spanjollë.

Në Rusi, disa qindra banorë u detyruan të braktisin shtëpitë e tyre në Khakasia, pasi përmbytjet e shkaktuara nga shirat e dendura dhe shkrirja e dëborës mbeten ende problematike në rajon.

Autoritetet ruse kanë vënë në dispozicion varka për të shpëtuar qytetarët.