Ngërçi për krijimin e koalicionit qeverisës në Izrael, sot përfundon afati i opozitës

Partitë opozitare në Izrael janë duke garuar me kohën për të arritur formimin e një koalicioni qeverisës, çka mund t’i jepte fund qeverisjes 12-vjeçare të kryeministrit Benjamin Netanyahu. Afati i tyre përfundon sonte në mesnatë.

Në vetëm dy vite në Izrael janë zhvilluar katër zgjedhje të përgjithshme duke e lënë vendin në një ngërç politik, ndërsa kryeministri Netanyahu është në gjyq për akuzat korrupsion dhe mashtrim.

Kundërshtarët e tij kanë bashkuar forcat për të formuar një qeveri dhe për ta lënë 71-vjecarin jashtë pushtetit, por ndërsa opozitari, Lapid dhe ekstremisti nacionalist, Bennet kanë arritur të bien dakord për një qeverisje me rotacion mes tyre, ka ende mosmarrëveshje rreth disa emërimeve politike.

Ata po hyjnë në orët e fundit për të arritur një marrëveshje dhe media izraelite raporton se Lapid me shumë gjasa do të shpallë koalicionin gjatë ditës së sotme.

Ai duhet të informojë presidentin Rivlin se ka formuar një koalicion me shumicë qeverisëse me të paktën 61 vende në parlament. Asambleja do të duhet të mblidhet brenda një jave për të dhënë votëbesimin.

Nëse Lapid humbet afatin e mesnatës, vendi pritet të shkojë serish në zgjedhjet e pesta në pak më shumë se dy vjet, dhe Netanyahu do të kishte një shans tjetër për të mbajtur pozicionin e tij.

Një qeveri emergjente u formua vitin e kaluar midis Netanyahut dhe ish-shefit ushtarak Gantz për të luftuar pandeminë e coronavirusit, por shpejt u zhyt në grindje politike dhe qeveria ra në dhjetor. Kjo qeveri mbetet në fuqi si qeveri kujdestare.

LEXONI GJITHASHTU: 

• Opozita izraelite drejt një marrëveshje për qeverinë e re, Netanyahu: Rrezik për sigurinë e vendit
• Sekretari amerikan i Shtetit premton zgjidhje të barabartë mes Izraelit dhe Palestinës
• Armëpushimi mes Izraelit dhe Palestinës, ministri i jashtëm i Egjiptit takim sot me homologun izraelit