Trump prezanton TrumpRx, premton ulje drastike të çmimeve të barnave

Presidenti Donald Trump theksoi të mërkurën marrëveshjet e tij me kompanitë farmaceutike, të cilat, sipas tij, do të ulin çmimet e barnave.

“Kostot e barnave tuaja do të bien ndjeshëm dhe unë përdor kërcënimin e tarifave për të bërë që vendet e huaja, të cilat nuk do ta kishin bërë kurrë këtë, të paguajnë koston e këtij reduktimi gjigant të dollarit”, tha Trump në fjalimin e tij në Shtëpinë e Bardhë.

Presidenti ka njoftuar të ashtuquajturat marrëveshje çmimesh të “Kombit Më të Favorizuar” me pesë prodhues ilaçesh, të cilat synojnë uljen e çmimit të barnave të shitura në SHBA në nivelin më të ulët të disponueshëm në vendet homologe. Si pjesë e këtyre marrëveshjeve vullnetare, kompanitë kanë thënë se do t’i shesin barna Medicaid-it dhe do të vendosin çmimet e barnave të reja në nivelet e “Kombit Më të Favorizuar”.

Disa ilaçe të suksesshme për humbje peshe do të jenë të disponueshme për vetëm 149 dollarë në muaj dhe më shumë të regjistruar në Medicare do të kenë qasje në to, sipas dy prej marrëveshjeve.

Gjithashtu, prodhuesit farmaceutikë kanë premtuar të marrin pjesë në platformën e re online TrumpRx, e cila do të fillojë të funksionojë në janar. Faqja e internetit do t’i drejtojë vizitorët te kanalet e prodhuesve farmaceutikë për kontakte direkte me konsumatorin, ku produktet e tyre do të jenë të disponueshme me zbritje për ata që paguajnë me para në dorë dhe heqin dorë nga sigurimi.

Por ekspertët kanë vënë në pikëpyetje nëse marrëveshjet do të kenë një ndikim të rëndësishëm në çmimet e barnave. Medicaid tashmë merr zbritje të mëdha nga prodhuesit e barnave dhe ilaçet shpesh lançohen në SHBA, duke i bërë krahasimet e çmimeve me vendet e tjera të parëndësishme. Gjithashtu, shumë pacientë nuk kanë mundësi të paguajnë me para në dorë për ilaçet e tyre, megjithëse ilaçet për humbje peshe mund të jenë përjashtim.

LEXONI GJITHASHTU:

• Trump mban fjalimin kombëtar, kritikon Bidenin dhe prezanton iniciativa të reja