Putin urdhëron pushtimin e plotë të Zaporizhias

Vladimir Putin ka urdhëruar ushtrinë ruse të vazhdojë fushatën për të pushtuar plotësisht rajonin Zaporizhia në jug të Ukrainës, pasi një komandant i lartë raportoi se forcat ruse ishin tani brenda rreth 15 kilometrave nga qyteti më i madh i rajonit.

Deklaratat u bënë në një video-konferencë në Kremlin me udhëheqjen e lartë ushtarake dhe Ministrin e Mbrojtjes Andrei Belousov, një ditë pasi Putin foli në telefon me Presidentin e SHBA-së Donald Trump në lidhje me perspektivat për një marrëveshje paqeje në Ukrainë.

Komandanti i grupit ushtarak rus “Dnieper”, gjeneral-koloneli Mikhail Teplinsky, tha se forcat ruse po i afrohen qytetit të Zaporizhias, i cili para luftës kishte një popullsi prej mbi 700,000 banorësh.

Rajoni më i gjerë, nga i cili Moska kontrollon rreth 75%, është një nga katër provincat ukrainase që Putini pushtoi në vitin 2022.

“Njësitë e vijës së parë ndodhen rreth 15 kilometra nga periferia jugore e qytetit të Zaporizhias”, tha Teplinsky. Putin u përgjigj se e dinte se sa mirë të përgatitura ishin mbrojtjet ukrainase në zonë dhe “sa e vështirë është situata”, duke shtuar, megjithatë, se forcat ruse “po arrijnë të përmbushin detyrat që u janë caktuar”.

Pastaj ai dha një urdhër të qartë: “Në të ardhmen e afërt është e nevojshme të vazhdohet ofensiva, së bashku me grupin lindor, për çlirimin e Zaporizhias”.

Më parë, Shefi i Shtabit të Përgjithshëm, Gjenerali Valery Gerasimov, kishte deklaruar se forcat ruse po përparonin pothuajse përgjatë gjithë gjatësisë së frontit, ndërsa forcat ukrainase ishin të përqendruara në mbrojtje dhe kundërsulm.

Sipas tij, deri në vitin 2025, Rusia kishte pushtuar 6,640 kilometra katrorë të territorit ukrainas dhe 334 fshatra, me përparimet e dhjetorit që ishin më të shpejtat e vitit.