Iran: Policia u jep 3 ditë kohë të rinjve “të përfshirë pa dashje” në trazira që të dorëzohen

Shefi i policisë iraniane u dha sot një afat tre-ditor të gjithë atyre që “janë përfshirë pa dashje në trazira” që të dorëzohen te autoritetet, duke siguruar se do të marrin dënim “më të lehtë”.

“Të rinjtë që u përfshinë pa dashje në trazira konsiderohen njerëz të mashtruar, jo ushtarë armiq”, tha Ahmad Reza Radan në televizionin shtetëror.

Irani po përballet me një lëvizje të madhe antiqeveritare që filloi më 28 dhjetor në Teheran nga tregtarët që protestonin kundër kostos së lartë të jetesës. Të premten e kaluar, agjencia e lajmeve Tasnim e Iranit raportoi se deri më tani janë arrestuar rreth 3,000 persona, por grupet e të drejtave të njeriut thonë se janë arrestuar 20,000 të tillë.

Qeveria iraniane pretendon se “rebelët” po manipulohen nga SHBA-të dhe Izraeli dhe se ata i kanë shndërruar demonstratat paqësore në “trazira”.

Zëdhënësi i gjyqësorit, Asghar Jahangir, përsëriti se të arrestuarit do të gjykohen shpejt, duke paralajmëruar se disa nga akuzat mbartin dënimin me vdekje.