Siri: 120 anëtarë të ISIS arratisen nga burgu gjatë luftimeve

Ministria e Brendshme Siriane tha të martën se 120 anëtarë të grupit Shteti Islamik (ISIS) u arratisën nga një burg në verilindje të Sirisë të hënën, mes përleshjeve midis forcave qeveritare dhe Forcave Demokratike Siriane (SDF) të udhëhequra nga kurdët, të cilat po ruajnë burgun.

Forcat e sigurisë arrestuan 81 prej të arratisurve, “ndërsa vazhdojnë përpjekjet intensive për të ndjekur të arratisurit e mbetur dhe për të marrë masat e nevojshme ligjore kundër tyre”, thuhet në deklaratë.

SDF-ja dhe qeveria shkëmbyen akuza për arratisjen nga burgu në qytetin Saddadekh, mes dështimit të një marrëveshjeje armëpushimi midis dy palëve.

Gjithashtu këtë të martë, SDF akuzoi “fraksionet e lidhura me Damaskun” për ndërprerjen e furnizimit me ujë në burgun al-Aqtan, pranë qytetit të Rakas, në atë që e quajtën një “shkelje flagrante të kushteve humanitare”.

SDF, forca kryesore e mbështetur nga SHBA-të që luftoi ISIS-in në Siri, kontrollon më shumë se një duzinë burgjesh në verilindje, ku rreth 9,000 anëtarë të ISIS-it janë mbajtur për vite me radhë pa gjyq.

Shumë nga ekstremistët e ndaluar besohet se kanë kryer mizori në Siri dhe Irak pasi Shteti Islamik shpalli kalifat në qershor 2014 në pjesë të mëdha të Sirisë dhe Irakut.