Ish-ministri britanik jep dorëheqjen nga Parlamenti

Ish-deputeti i Partisë Laburiste dhe ish-ministri i Shëndetësisë në Mbretërinë e Bashkuar, Andrew Gwynne, ka konfirmuar se do të japë dorëheqjen nga Parlamenti.

Në një postim në rrjetet sociale, Gwynne njoftoi se ka aplikuar për një nga postet formale parlamentare, një procedurë arkaike që çon automatikisht në largimin e tij nga Dhoma e Komunave.

Raportet për dorëheqjen e tij u shfaqën që në orët e para të mëngjesit, duke nxitur spekulime se kryetari i Bashkisë së Mançesterit të Madh, Andy Burnham, mund të kandidojë për ta zëvendësuar në zgjedhjet e pjesshme që pritet të mbahen.

Deklarata që konfirmon tërheqjen e Gwynne përfshin edhe një shënim nga mjeku i tij i familjes, ku thuhet se ai vuan nga probleme të shëndetit mendor, është nën “doza shumë të larta ilaçesh” dhe nuk ka gjasa të “kthehet në normalitetin e tij të mëparshëm”.

Vetë Gwynne deklaroi se ka “vuajtur nga probleme serioze shëndetësore për pjesën më të madhe të 21 viteve” që ka shërbyer si deputet, gjendje që u përkeqësua pas skandalit të vitit të kaluar, kur u zbulua se ai kishte qenë pjesë e një grupi në WhatsApp ku qarkullonin mesazhe fyese.

“Gjatë këtyre viteve nuk kam bërë gjithçka siç duhet dhe sigurisht kam bërë gabime, por gjithmonë kam bërë më të mirën time dhe kam ndihmuar dhjetëra mijëra zgjedhës me problemet e tyre,” tha ai, duke shtuar se ndihma ndaj qytetarëve ka qenë kënaqësia më e madhe e karrierës së tij politike.

Gwynne përfundoi duke theksuar se së shpejti do të zhvillohen zgjedhje të pjesshme dhe duke i uruar pasardhësit të tij sukses në përfaqësimin e zonës zgjedhore që ai e cilëson si “më të mirën në Mbretërinë e Bashkuar”.