Mediat rumune: Drogë dhe alkool në minibusin që shkaktoi vdekjen e 7 tifozëve grekë

“Hetuesit kanë zbuluar substanca të ndaluara, alkool dhe pije energjike në minibusin që transportonte tifozët e PAOK-ut, në aksidentin tragjik në Qarkun Timis të Rumanisë”, duke hapur një fushë të re hetimi mbi sjelljen e shoferit dhe pasagjerëve. Sipas mediave rumune analizat e gjakut tregojnë se shoferi 29-vjeçar kishte konsumuar substanca të ndaluara, përfshirë edhe kanabis, para përplasjes fatale.

“Në minibusin në të cilin vdiqën shtatë persona, dyshohet se u gjetën substanca të ndaluara, stimulantë dhe alkool. Gjithashtu, gjatë seancave dëgjimore, pasagjeri në pjesën e përparme të djathtë të minibusit deklaroi se shoferi kishte thithur edhe disa cigare me kanabis para aksidentit, dhe sipas informacionit tonë, shoferi 29-vjeçar që po drejtonte këtë minibus rezultoi gjithashtu pozitiv për substanca të ndaluara, pas analizave në Institutin Kombëtar të Mjekësisë Ligjore”, shkruajnë mediat.

Autoritetet po hetojnë gjithashtu nëse ndonjë nga pasagjerët kishte përdorur lëndë të ndaluara para aksidentit.

Minibusi, që transportonte dhjetë persona, u përplas ballë për ballë me një kamion pasi kishte kaluar në korsinë e kundërt, duke mos kryer asnjë manovër shmangëse, sipas pamjeve të aksidentit. Tragjedia la shtatë të vdekur dhe tre të plagosur.

Një nga të mbijetuarit deklaroi se gjatë tejkalimit, sistemi automatik për mbajtjen e korsisë u aktivizua, duke bllokuar timonin. Specialistët po shqyrtojnë imazhet e aksidentit dhe e konsiderojnë të pamundur që kjo të ketë qenë shkaku kryesor i përplasjes.

Shoferi i kamionit, një shtetas polak me përvojë 34-vjeçare dhe mbi 1 milion kilometra të përshkuara, tha se nuk kishte parë kurrë një situatë të tillë: “Fjalët e mia nuk mjaftojnë për të përshkruar tmerrin që përjetova.”

Hetuesit po shqyrtojnë gjithashtu gabimet e mundshme njerëzore dhe dështimet teknike të mjetit që mund të kenë kontribuar në aksident.

Ekipet mediatike greke, përfshirë ERT dhe Protothema, udhëtuan në vendngjarje për të raportuar nga afër, duke treguar ndikimin dramatik të aksidentit dhe përmasën e tragjedisë.