Pse Kina veproi me shpejtësi në ekzekutimin e anëtarëve të klanit mafioz Ming

Vendimi i Kinës për të ekzekutuar me shpejtësi 11 anëtarë të një familjeje të krimit të organizuar nga veriperëndimi i Myanmarit nuk ka ardhur si surprizë për vëzhguesit e rajonit. Të dënuar me vdekje që në shtator, anëtarët e familjes Ming u përballën me një reagim të ashpër nga autoritetet kineze për shkak të krimeve të rënda që u atribuohen.

Familjet Ming, Bau, Wei dhe Liu kishin dominuar qytetin kufitar Laukkaing, në shtetin e varfër Shan të Myanmarit, që nga viti 2009. Ato morën kontrollin pas një operacioni ushtarak të udhëhequr nga Min Aung Hlaing, aktualisht udhëheqësi i juntës ushtarake të Myanmarit, kundër ushtrisë etnike kryengritëse MNDAA.

Fillimisht të lidhura me tregtinë e opiumit dhe drogës sintetike, këto klane e zhvendosën aktivitetin drejt kazinove dhe më pas drejt mashtrimeve online. Kompleksët që drejtonin, veçanërisht në Laukkaing, u bënë famëkeq për brutalitetin ekstrem. Dhjetëra mijëra punëtorë, kryesisht shtetas kinezë, u mashtruan me premtime për punë të paguara mirë, por përfunduan të burgosur dhe të detyruar të kryenin mashtrime të sofistikuara online, kryesisht kundër viktimave kineze.

Kompleksi më i njohur, “Villa Crouching Tiger”, i drejtuar nga familja Ming, u përfshi në një incident të rëndë në tetor 2023, kur gjatë një tentative arratisjeje u vranë disa shtetas kinezë. Ky episod e detyroi Pekinin të vepronte.

Me mbështetjen e dukshme të Kinës, forcat e MNDAA-së rimorën kontrollin e Laukkaing-ut, arrestuan drejtuesit e katër familjeve dhe dorëzuan mbi 60 të afërm dhe bashkëpunëtorë të tyre autoriteteve kineze. Patriarku i familjes Ming, Ming Xuechang, vrau veten pasi u kap, sipas autoriteteve.

Kina publikoi detaje tronditëse nga hetimet për të justifikuar ndëshkimin ekstrem. Pesë anëtarë të familjes Bau presin ende ekzekutimin, ndërsa proceset gjyqësore për familjet Wei dhe Liu nuk kanë përfunduar.

Autoritetet kineze e kanë konsideruar këtë çështje veçanërisht të ndjeshme, pasi familjet ishin kineze etnike dhe kishin lidhje të forta në provincën Yunnan. Paralelisht, Pekini ka shtuar presionin rajonal, duke siguruar ekstradimin e figurave të tjera të mëdha të mashtrimeve nga Tajlanda dhe Kamboxhia, si dhe ka kthyer dhjetëra mijëra shtetas kinezë për t’u përballur me drejtësinë.

Megjithatë, pavarësisht goditjes së fortë, aktiviteti mashtrues nuk është zhdukur. Ai është zhvendosur dhe përshtatur në zona të tjera të Myanmarit dhe mbetet një biznes i madh në Kamboxhia, duke treguar kufijtë e ndërhyrjeve represive edhe kur ato janë ekstreme.

Sipas organizatave për të drejtat e njeriut, Kina kryen më shumë ekzekutime se çdo vend tjetër në botë, ndonëse shifrat e sakta mbahen sekret shtetëror. Zyrtarë kinezë shpesh dënohen me vdekje për korrupsion, por rasti i familjes Ming lidhej me akuza shumë më të rënda, përfshirë vrasje, tortura dhe drejtimin e një rrjeti masiv mashtrimesh.