Melania Trump promovon filmin e ri: Nuk është ajo që mendoni

Zonja e Parë e SHBA-së, Melania Trump, ka theksuar se filmi i saj i ri “Melania” nuk duhet parë si një dokumentar klasik, por si një “përvojë krijuese” që ofron perspektiva dhe momente personale nga jeta e saj.

Gjatë premierës së filmit, të mbajtur të enjten në mbrëmje në teatrin e operës të Qendrës Trump Kennedy – e riemërtuar së fundmi – Melania Trump iu drejtua të ftuarve, mes të cilëve anëtarë të kabinetit, ndikues konservatorë dhe figura publike, duke sqaruar natyrën e projektit. “Disa e kanë quajtur këtë një dokumentar. Nuk është. Është një përvojë krijuese që ofron perspektiva, njohuri dhe momente”, u shpreh ajo.

Filmi “Melania” vjen pas më shumë se një viti prodhimi dhe shënon një hap të pazakontë për një zonjë të parë në detyrë. Projekti është realizuar pas një marrëveshjeje prej 40 milionë dollarësh me Amazon MGM Studios, ndërsa buxheti i marketingut arrin në 35 milionë dollarë, sipas burimeve të njohura me çështjen.

E pyetur për mënyrën se si e mat suksesin e filmit, Melania Trump tha se nuk fokusohet te shifrat financiare apo statistikat e shikueshmërisë. “Jam shumë krenare për filmin. Njerëzve mund t’u pëlqejë ose jo, dhe kjo është zgjedhja e tyre. Për mua, është tashmë i suksesshëm”, deklaroi ajo për CNN gjatë ecjes në tapetin e kuq.

Filmi dokumenton 20 ditët përreth rikthimit të Donald Trump në Shtëpinë e Bardhë dhe i jep publikut një vështrim nga brenda jetës së zonjës së parë. Si producente ekzekutive, Melania Trump ka pasur kontroll të plotë editorial mbi projektin. Regjisorit Brett Ratner dhe ekipit të tij iu dha qasje edhe pas inaugurimit presidencial, përfshirë udhëtime me Air Force One dhe vizita në zona të goditura nga fatkeqësi natyrore në Karolinën e Veriut dhe Kaliforni.

Gazetarët nuk u ftuan në premierë, por burime që e kanë parë filmin thonë se ai është kuruar me kujdes dhe përmban disa detaje të reja nga përgatitjet për Ditën e Inaugurimit.

Ndërkohë, filmi ka nxitur edhe polemika ndërkombëtare. Ai është tërhequr nga kinematë në Afrikën e Jugut, sipas një deklarate të një rrjeti kinemash për CNN, për shkak të një vendimi të distributorit lokal, në një kohë kur marrëdhëniet mes këtij vendi dhe administratës Trump janë të tensionuara.

Pavarësisht debatit, projekti “Melania” tregon se roli i zonjës së parë mund të shndërrohet në një biznes shumë fitimprurës. Filmi do të shfaqet premierë me ftesa në 21 qytete dhe do të dalë në kinematë ndërkombëtare të premten, duke testuar interesin e publikut në një periudhë kur shitjet e biletave janë në rënie.

View this post on Instagram

A post shared by HOLA! USA (@holausa)