Zjarret në dy ndërtesa në Indi, 25 viktima dhe 27 të zhdukur

25 persona kanë humbur jetën pas një zjarri në dy ndërtesa në Kalkutë të Indisë. Autoritetet lokale të theksuan se kërkimet vazhdojnë për rreth 27 persona të zhdukur. Zjarri shkatërroi ndërtesat e një kompanie dekorimi dhe një restoranti të ushqimit të shpejtë.

Ministri Sujit Bose tha se numri i të vdekurve mbetet i përkohshëm pasi ende nuk dihet fati i personave të zhdukur. Kreu i shërbimeve lokale të emergjencës tha se ndërtesat që u shkatërruan nuk kishin të gjitha pajisjet e sigurisë të kërkuara me ligj.

Zjarret janë të zakonshme në Indi, për shkak të gjendjes së dobët të infrastrukturës. Në fillim të janarit, një klub nate në qytetin bregdetar të Goas u përfshi nga flakët, duke vrarë 25 persona.