Miliarda euro dëme në Portugali pas stuhisë “Christine”

Stuhia “Christine”, e cila goditi Portugalinë javën e kaluar, la qindra shtëpi në pjesën qendrore të vendit pa çati, dhjetëra mijëra familje pa energji elektrike dhe banorë që presin në radhë për të marrë ndihmë emergjente për të rindërtuar ndërtesat e tyre, ndërsa autoritetet paralajmërojnë se dëmet mund të arrijnë në miliarda euro.

Stuhia përfshiu rajonin të mërkurën e kaluar, duke sjellë erëra deri në 200 km/orë dhe shira të rrëmbyeshëm që rrëzuan pemë dhe shkulën çati. Të paktën gjashtë persona vdiqën dhe qindra mijëra familje u zhytën në errësirë.

“Çatia u rrëzua nga era, të gjitha dritaret u thyen, gjithçka është në kaos”, tha Paula Franco, ndërsa priste në radhë në Leiria për të marrë pllakat e shpërndara nga autoritetet për të riparuar shtëpinë e saj.

Qeveria e Portugalisë miratoi dje një paketë kredish dhe subvencionesh prej 2.5 miliardë eurosh për të ndihmuar qytetarët dhe bizneset të rindërtohen pas motit të keq.

Leiria, një nga qendrat kryesore industriale të vendit, ishte ndër zonat më të goditura nga moti i keq.

Qindra shtëpi, rrugë, shkolla, fabrika dhe linja hekurudhore u dëmtuan. Në bazën ajrore Monte Real, pranë Leirias, stuhia shkatërroi avionë, përfshirë avionë luftarakë F16.

Gati 170,000 familje mbeten pa energji elektrike sot, tha Maria da Graça Carvalho, Ministrja e Energjisë dhe Mjedisit e Portugalisë.

Shuma e dëmit në rajon mund të arrijë midis 1.5-2 miliardë eurosh, tha për televizionin NOW Henrique Carvalho, president i Shoqatës së Biznesmenëve të Leirias.