Disney emëron drejtorin e ri ekzekutiv, kush zëvëndëson Bob Iger pas gati dy dekadash

Walt Disney ka emëruar Josh D’Amaro si drejtorin e ri ekzekutiv. D’Amaro, një veteran me 28 vjet përvojë në kompani, do të zëvendësojë shefin aktual Bob Iger. Ai pritet të fillojë punën në rolin e ri më 18 mars.

Vendimi i jep fund një enigme trashëgimie për gjigantin e argëtimit, të cilin Iger e ka udhëhequr për afërsisht dy dekada, përveç një ndërprerjeje të shkurtër që përfundoi në vitin 2022 kur bordi shkarkoi pasardhësin e tij dhe i kërkoi Iger të kthehej.

Iger nisi shpejt ristrukturimin e firmës, duke synuar të trajtonte shpenzimet në rritje në biznesin e transmetimit dhe filmave, të rifitonte vrullin për ESPN-në e fokusuar në sport dhe të zgjeronte parqet dhe linjat e saj të lundrimit.

D’Amaro iu bashkua kompanisë në vitin 1998 në Disneyland Resort, përpara se të ngrihej në pozicionin e tij aktual si kryetar i divizionit Disney Experiences, i cili ka 185,000 punonjës dhe gjeneroi 36 miliardë dollarë të ardhura vitin e kaluar.

Në këtë rol, 54-vjeçari mbikëqyr 12 parqe tematike dhe 54 resorte në të gjithë botën. Ai ka trajtuar projekte të tilla si World of Frozen dhe Star Wars: Galaxy’s Edge, si dhe ka menaxhuar sipërmarrje dixhitale siç është bashkëpunimi i Disney me firmën që qëndron pas Fortnite.

Disney gjithashtu emëroi Dana Walden, aktualisht bashkëkryetare e biznesit të argëtimit, në një rol të ri si drejtoreshë krijuese, duke i raportuar D’Amaro-s.

Walden, e cila njihet jashtë punës për miqësinë e saj me ish-nënkryetaren Kamala Harris, ishte parë si rivalja kryesore e D’Amaro-s për punën e lartë.