Bill Gates: Ishte budallallëk të kaloja kohë me Epstein, më vjen keq për këtë

Miliarderi amerikan Bill Gates tha sot se ishte “budallallëk” të kalonte kohë me Jeffrey Epstein, se i vjen keq që e ka njohur dhe e cilësoi të rremë një email nga dokumentet e publikuara së fundmi, duke shtuar se e njihte atë vetëm në kontekstin e punës humanitare, pa u takuar me viktimat e Epstein.

“Me sa duket, Jeffrey i shkroi një email vetes. Ai email nuk u dërgua kurrë, emaili ishte i rremë. Kështu që nuk e di se çfarë po mendonte në atë kohë”, tha Gates në një intervistë me televizionin australian “9 News”, duke shtuar se çdo minutë e kaluar me të ishte një gabim.

Gates theksoi se ishte e vërtetë që ai merrte pjesë vetëm në darka, se nuk kishte qenë kurrë në Ishullin e Epstein dhe se nuk ishte takuar me gratë e përfshira në skandal.

“Ndërsa koha e kaluar me të ishte një gabim, ajo nuk kishte të bënte fare me atë sjellje”, tha Gates.

Ai shtoi se u takua me Epstein në vitin 2011 në kontekstin e punës së tij filantropike dhe mbledhjes së donacioneve për shëndetin global përmes Fondacionit Gates.

“Isha një nga shumë ata që pendohen që e kanë takuar ndonjëherë”, tha Gates.

Emaili kontrovers daton nga korriku i vitit 2013, në të cilin Epstein i drejtohet miliarderit si “i dashur Bill” dhe përmend “sëmundjen veneriane” të Gates, dhe gjithashtu pretendon se Gates i kërkoi atij “antibiotikë që ai mund t’ia jepte fshehurazi Melindës”, duke iu referuar ish-gruas Melinda French Gates.

Një zëdhënës i Gates tha më parë se akuzat ishin “absolutisht absurde dhe plotësisht të rreme” dhe se dokumentet në fakt tregonin zhgënjimin e Epstein që nuk kishte një marrëdhënie të vazhdueshme me Gates dhe “sa larg ishte i gatshëm të shkonte ai për ta kompromentuar atë”.