Ministri i Jashtëm iranian në Gjenevë për raundin e ri të negociatave me SHBA-në

Ministri i Jashtëm iranian, Abbas Araghchi ka mbërritur në Gjenevë, ku do të fillojë një raund i ri negociatash me Shtetet e Bashkuara mbi programin bërthamor të Iranit.

Sipas Teheranit, bisedimet do të fillojnë nesër, të martën. Irani dhe Shtetet e Bashkuara rivendosën dialogun në Oman në fillim të shkurtit, mes kërcënimeve për ndërhyrje ushtarake amerikane.

“Ministri i Jashtëm mbërriti në Gjenevë në krye të një delegacioni diplomatik dhe ekspertëve për të marrë pjesë në raundin e dytë të negociatave mbi programin bërthamor”, njoftoi sot televizioni shtetëror iranian nëpërmjet Telegramit.

Ai është planifikuar gjithashtu të takohet me homologët e tij nga Zvicra dhe Omani, si dhe me Drejtorin e Përgjithshëm të Agjencisë Ndërkombëtare të Energjisë Atomike (IAEA) Rafael Grossi.

Shtëpia e Bardhë konfirmoi dje, të dielën në mbrëmje, se i dërguari i saj, Steve Witkoff , dhe dhëndri i Presidentit të SHBA-së Donald Trump, Jared Kushner do të udhëtojnë për në Gjenevë këtë javë për bisedime. Ata gjithashtu do të marrin pjesë në bisedime me Rusinë dhe Ukrainën.