Samiti i IA në Indi, Bill Gates anulon fjalimin mes polemikave për lidhjet me Epstein

Bashkëthemeluesi miliarder i Microsoft, Bill Gates, është tërhequr nga fjalimi i tij në Samitin e Ndikimit të IA-së në Indi, ndërsa vazhdon të përballet me pyetje në lidhje me marrëdhënien e tij me abuzuesin Jeffrey Epstein.

Bashkëthemeluesi miliarder i Microsoft udhëtoi për në Indi, ku fondacioni i tij punon me qeverinë për të ofruar inteligjencë artificiale për të mirën sociale, në fillim të kësaj jave dhe u deklarua se do të fliste në samitin ndërkombëtar menjëherë pas kryeministrit të vendit, Narendra Modi.

Por Gates u tërhoq papritur të enjten në mëngjes, disa orë para se të fliste para delegatëve, përfshirë presidentin francez, Emmanuel Macron, dhe njeriun më të pasur të Indisë, Mukesh Ambani.

Pas kësaj tërheqjeje Fondacioni Gates tha në një deklaratë: “Pas shqyrtimit të kujdesshëm dhe për të siguruar që fokusi të mbetet në prioritetet kryesore të samitit të IA-së, Gates nuk do ta mbajë fjalimin e tij”.

Ndërsa fondacioni i tij nuk e trajtoi në mënyrë të qartë atë që Gates kishte frikë se mund ta shpërqendronte vëmendjen nga fokusi i synuar i samitit, publikimi i fundit i dosjeve të Epstein në fund të janarit intensifikoi polemikat rreth lidhjeve të tij me financierin e turpëruar.

Ndërkohë, Gates ka thënë se “i vjen keq” që e ka njohur Epsteinin, pas akuzave se ai i kishte fshehur një sëmundje seksualisht të transmetueshme gruas së tij të atëhershme, pasi kontakti me “vajza ruse” u shfaq në publikimin e fundit të dosjeve të Epsteinit.

Fondacioni Gates theksoi të enjten se “mbetet plotësisht i përkushtuar ndaj punës në Indi për të çuar përpara qëllimet e përbashkëta të shëndetit dhe zhvillimit” dhe do të përfaqësohet nga Ankur Vora, president i zyrave të tij në Afrikë dhe Indi, në samit.

Në samitin e IA-së në Delhi do të flasin edhe drejtori ekzekutiv i OpenAI, Sam Altman, drejtori ekzekutiv i Google, Sundar Pichai dhe këshilltari i Shtëpisë së Bardhë për IA-në, Sriram Krishnan.