Trump do të urdhërojë publikimin e dosjeve qeveritare për UFO-t dhe alienët

Presidenti i SHBA-së, Donald Trump ka shprehur qëllimin e tij për të urdhëruar departamentet dhe agjencitë e qeverisë federale që të gjejnë dhe publikojnë dosjet lidhur me alienët dhe objektet fluturuese të paidentifikuara (UFO) , duke iu përgjigjur kërkesës së një pjese të amerikanëve prej dekadash.

“Duke pasur parasysh interesin e jashtëzakonshëm që është shprehur, do t’i urdhëroj Sekretarit të Luftës dhe të gjitha ministrive dhe agjencive të tjera përkatëse që të fillojnë procesin e gjetjes dhe publikimit të të dhënave qeveritare që lidhen me jetën jashtëtokësore, fenomenet ajrore të panjohura dhe objektet fluturuese të paidentifikuara”, shkroi ai në Truth Social.

Më parë, republikani akuzoi paraardhësin e tij demokrat Barack Obama për zbulimin e informacionit të klasifikuar kur tha gjatë një podkasti, ndoshta me shaka, se alienët ekzistojnë vërtet.

“Nuk e di nëse alienët janë të vërtetë apo jo, megjithatë, ish-presidenti demokrat bëri një gabim të madh”, tha Donald Trump.

Në një podkast gjatë fundjavës, Barack Obama iu përgjigj një pyetjeje në lidhje me ekzistencën e alienëve: “Ata ekzistojnë vërtet, por unë nuk i kam parë”.

Ai shtoi se, për aq sa di ai, nuk ka asnjë objekt nëntokësor të përdorur për të fshehur ekzistencën e tyre – ai po i referohej Zonës 51, bazës së Forcave Ajrore Amerikane në Nevada, subjekt i teorive të pafundme konspirative.