Turqia përgatitet për një skenar konflikti midis Iranit dhe SHBA-së

Turqia po shqyrton të gjitha masat e mundshme që mund të merren në rast të një konflikti midis fqinjit të saj, Iranit, dhe Shteteve të Bashkuara, tha një burim diplomatik turk për Reuters të mërkurën.

Irani dhe Shtetet e Bashkuara rifilluan negociatat në fillim të këtij muaji, ndërsa Uashingtoni forcon kapacitetet e tij ushtarake në Lindjen e Mesme.

Irani ka kërcënuar të sulmojë bazat amerikane në rajon nëse sulmohet, por diplomati më i lartë i Teheranit tha të martën se një marrëveshje me SHBA-në është ende e mundur.

“Po i shqyrtojmë të gjitha skenarët”

Turqia, një anëtare e NATO-s që kufizohet me Iranin në lindje, ka thënë se kundërshton çdo ndërhyrje ushtarake në Iran, duke paralajmëruar për rrezikun e destabilizimit të rajonit.

Ankaraja është në kontakt me të dyja palët për të ulur tensionet dhe ka bërë thirrje që çështjet të zgjidhen përmes kanaleve diplomatike.

“Sigurisht, të gjitha aspektet e masave që mund të merren në rast të një zhvillimi negativ po vlerësohen”, tha burimi, i cili foli në kushte anonimiteti.

“Po shqyrtojmë të gjitha skenarët dhe po hartojmë masa për sigurinë e qytetarëve tanë”, shtoi ai, por vuri në dukje se çdo masë që do të ” shkelte sovranitetin e Iranit përjashtohet “.

Burimi nuk dha detaje rreth masave që Turqia po shqyrton.

Më parë, zyra e presidencës turke për luftimin e dezinformimit mohoi raportet se Turqia po planifikonte të hynte në territorin iranian për të parandaluar një fluks të mundshëm refugjatësh.