Rasti Epstein, Bill Clinton do të dëshmojë sot për marrëdhënien e tij me financuesin pedofil

Ish-Presidenti i SHBA-së, Bill Clinton, pritet të dëshmojë sot me dyer të mbyllura para komisionit të Dhomës së Përfaqësuesve që po heton rastin e Jeffrey Epstein, ndërsa demokratët kërkojnë të përqendrojnë vëmendjen te lidhjet e financierit dhe të dënuarit për abuzues seksual me Presidentin Donald Trump.

Emri dhe fotot e Bill Clinton, 79 vjeç, janë shfaqur vazhdimisht në dokumente që lidhen me hetimin e aktiviteteve kriminale të Epstein, por ish-presidenti nuk është akuzuar kurrë për asgjë.

Ashtu si Trump, Bill Clinton pati afera me financierin e Nju Jorkut dhe udhëtoi disa herë me avionin e tij privat në fillim të viteve 2000, pasi ai u largua nga Shtëpia e Bardhë. 

Në disa nga fotot e deklasifikuara së fundmi nga Departamenti i Drejtësisë, Bill Clinton shfaqet me Epstein në evente shoqërore, por edhe në ambiente private, ndonjëherë pranë grave fytyrat e të cilave janë të mbuluara. Në një foto, ai duket të jetë në një xhakuzi.

Bill Clinton ka pohuar vazhdimisht se nuk ishte në dijeni të krimeve të Epstein, i cili u deklarua fajtor në vitin 2008 për nxitjen e një të miture për prostitucion dhe vuajti një dënim me 18 muaj burg.

Në vitin 2019, kur Epstein u gjet i vdekur në qelinë e tij të burgut, Clinton tha se ai nuk kishte folur me të për më shumë se një dekadë.

Gruaja e tij Hillary këmbënguli në këtë fakt gjatë dëshmisë së saj të enjten.

“Shumica dërrmuese e njerëzve që kishin kontakt me të përpara se ai të pranonte fajësinë në vitin 2008 (…) nuk e dinin se çfarë po bënte ai”, theksoi Clinton para gazetarëve pas dëshmisë së saj.

Ashtu si gruaja e tij, Bill Clinton do të dëshmojë para komitetit nëpërmjet lidhjes video nga Chappaqua, New York, ku çifti zotëron një shtëpi.

Ish-sekretarja e shtetit dhe ish-zonja e parë, e cila kandidoi për presidente në vitin 2016, por humbi ndaj Trump, theksoi në dëshminë e saj se nuk kujton të ketë takuar ndonjëherë Epstein dhe nuk di asgjë për krimet e tij. Ajo gjithashtu ka akuzuar komitetin e udhëhequr nga republikanët se po përpiqet të largojë vëmendjen nga lidhjet e Trump me Epstein.